არგენტინული დოგი
არგენტინული დოგი
წყარო მონადირეინფო
არგენტინული დოგის უშუალო წინაპრები მასტიფისებრი თეთრი ძაღლები იყვნენ. ეს ძაღლები საუკეთესო საყარაულო თვისებებით არიან ცნობილნი, მაგრამ არგენტინაში ეს არ აკმაყოფილებდათ. მათ ძლიერი, ამტანი, გამორჩეული სანადირო თვისებებით დაჯილდოებული ძაღლი სჭირდებოდათ, რომელიც ძველისგან განსხვავებით ნაკლებად მასიური იქნებოდა და უკეთესად შეეგუებოდა არგენტინულ ჰავას.
ამ იდეის ხორცშესხმა არგენტინელმა კინოლოგმა ანტონიო მარტინესმა ითავა. მან თავისი ცნობილი ექსპერიმენტი 1920 წელს დაიწყო. მასტიფისებრ თეთრ ძაღლს ერთმანეთისგან განსხვავებული რამდენიმე ჯიშის ძაღლის სისხლი შეურია, კერძოდ: პოინტერის – ყნოსვის გაუმჯობესებისთვის, გერმანული დოგის – ელეგანტურობისთვის; ირლანდიური მგელმგუდავის -სისხარტისთვის, ბორდონული დოგის – სიძლიერისთვის; ბულტერიერის – მეტი სითამამისთვის; ბულდოგის -მეტი თავდაჯერებულობისთვის. ექსპერიმენტის ბოლოს მარტინესმა პუმასა და იაგუარზე სანადიროდ იდეალური ჯიშის სანადირო ძაღლი გამოიყვანა. არგენტინული დოგი წარმატებით გამოიყენება გარეულ ტახზე სანადიროდ. გარდა ამისა, არგენტინული დოგი ჩინებული ოთახის მცველი და შესანიშნავი კომპანიონია. გამოიყენება ასევე საძიებო სამაშველო საქმიანობებში, პოლიციის დამხმარედ და სამხედრო ოპერაციებში.
აღსანიშნავია რომ არგენტინული დოგის ყოლა აკრძალულია ზოგიერთ ქვეყანაში. ეს ქვეყნებია: უკრაინა, ისლანდია, ავსტრალია და სინგაპური. დიდ ბრიტანეთში არგენტინული დოგის უკანონო ფლობის შემთხვევაში ჯარიმის მაქსიმალური რაოდენობა 5 000 ევროს უტოლდება, ხოლო თავისუფლების აღკვეთა ექვსი თვით ხორციელდება. ამ ძაღლის ყოლა შეზღუდულია აგრეთვე ამერიკის შეერთებულ შტატებშიც.
“არგენტინელი”, როგორც დამოუკიდებელი ჯიში საერთაშორისო კინოლოგიურ ფედერაციაში 1964 წელს დარეგისტრირდა. დღეს ეს არის ჯიში, რომელიც ყველა იმ თვისებას ატარებს, რაც მას ექიმმა მარხტინესმა შესძინა. ის ადვილად იწვრთნება და იგეშება, იოლად ეგუება ნებისმიერ კლიმატურ და საცხოვრებელ პირობებს, ოღონდ ერთი პირობით, საჭიროებს ბუნებაში რეგულარულ გაყვანა-სეირნობას. ექსტერიერის ძირითადი შტრიხებია: სიმაღლე: ხვადი – 64-68 სმ, ძუებისთვის – 60-65 სმ. შეფერილობა: მხოლოდ თეთრი, დასაშვებია პატარა შავი ლაქა თავზე. წონა: 40 კგ. – 54 კგ.
სახელი არგენტინული დოგი ქვეყანა არგენტინა კინოლოგი ანტონიო მარტინესი ექსპერიმენტული სამუშაოების დასაწყისი ძაღლის გამოსაყვანად 1920 წელი ექსპერიმენტის დასასრული 1928 წელი წონა 40 კგ. – 54 კგ. სიმაღლე (ძუ) 60-65 სმ სიმაღლე (ხვადი) 64-68 სმ FCI კლასიფიკაცია ჯგუფი 2 სექცია 2.1