ჯვრის მონასტერი იერუსალიმში იმ ადგილზეა აშენებული, სადაც ჯვრის დასამზადებელი ხე მოჭრეს. თავის დროზე, ეს ადგილი ბიზანტიის იმპერატორმა კონსტანტინემ უბოძა მეფე მირიანს, რომელმაც აქ ტაძარი აღმართა. ტაძარი ვახტანგ გორგასალის მეფობის დროს გაიზარდა.
მტრების მიერ არაერთხელ დანგრეული ჯვრის მონასტერი, მეთერთმეტე საუკუნეში ბაგრატ მეოთხემ აღადგინა. თუმცა, მისი როგორც ქრისტიანული სამლოცველოს და კულტურის ცენტრის შენარჩუნება მხოლოდ მეცამეტე საუკუნემდე მოხერხდა, რადგან, ეგვიპტის სულთანმა მალეხან--ნასერ ბენ ხალუინმა ქართველი ბერები მონასტრიდან გააძევა და მონასტერი მეჩეთად აქცია.
მეთოთხმეტე საუკუნის დასაწყისში ქართველები და კონსტანტინეპოლელები სულთანთან ჩავიდნენ და მონასტრის დაბრუნება მოსთხოვეს.
მეთექვსმეტე საუკუნიდან ჩანს, რომ მონასტერი ისევ ქრისტიანების ხელშია. ოღონდ, ქართველების გარდა, აქ ბერძენი, სომეხი და სხვა ეროვნების ბერებიც ცხოვრობენ და მოღვაწეობენ. აქვე, კათოლიკებსაც ჰქონიათ თავიანთი საკურთხეველი.
მეჩვიდმეტე საუკუნეში ქართველებს ოსმალების მიერ დაწესებული გადასახადების გადახდა გაუჭირდათ და მონასტერი ერთმორწმუნე ბერძნებს გარკვეული საფასურის სანაცვლოდ გადასცეს. თუმცა, ქართველი ბერები არსად წასულან.
პირველი მსოფლიო ომის დასაწყისში ბერძნებმა მთავარი ტაძარი მოქმედი დატოვეს, ხოლო მონასტრის დანარჩენი ნაწილი- საგულდაგულოდ ჩაკეტეს.
როგორც ჩანს, იერუსალიმის საპატრიარქო ჯეროვნად მაინც ვერ უფრთხილდებოდა მონასტერს, რაც, 1948 წლიდან აქ განთავსებული ისრაელელი ჯარისკაცების მიერ სენაკების კედლების შელახვითაც დასტურდება. ისრაელელი ჯარისკაცები 1960-იანი წლების დასაწყისშიც იმყოფებოდნენ მონასტერში და სამხედრო მოსამსახურე მანდილოსნების წრთვნებს ატარებდნენ.
1966 წლის მარტში დოკუმენტური ფილმების გადასაღებად ისრაელში ჩავიდნენ საქართველოს ტელევიზიის რეჟისორი გურამ პატარაია, კინოპოერატორი გივი მელქაძე, მწერალი ილია რურუა. მათ დახვდნენ: საბჭოთა კავშირის ისრელის საელჩოს თანამშრომელი იური პავლოვი და ისრაელში საკდესის კორესპოდენტი ივან სტოვბუნი. საქართველოს ტელევიზიის წარგზავნილებს მუშაობაში დახმარებას უწევდნენ საბჭოთა კავშირის საგანგებო და სრულუფლებიანი ელჩი ისრაელში დიმიტრი ჩუვახინი და რუსული მართლმადიდებლური ეკლესიის იერუსალიმის მისიის მეთაური-არქიეპისკოპოსი გერმოგენი.
წმიდა მიწაზე ქართველებმა მასალები ორი ფილმისთვის გადაიღეს. შემდეგ, დოკუმენტურმა სურათებმა „ პალესტინის სიძველეთა საიდუმლოებამ “ და „ რუსთაველის ნაკვალევზე, “ მაყურებლების მოწონება დაიმსახურეს, ხოლო რეჟისორმა გურამ პატარაიმ რუსთაველის სახელობის პრემია მიიღო. ილია რურუამ შემოქმედებითი ჯგუფის მუშაობის შესახებ წიგნი „ მოგზაურთა და მენავეთათვის“ დაწერა.
ამ დროს, ჯვრის მონასტრის წინამძღვარს მამა იოაკიმე მაიმერისს უთქვამს: ბედნიერები ვართ იმით, რომ 1966 წელს, ამ მონასტრის ერთ-ერთი ისტორიული მკვიდრის- შოთა რუსთაველის დაბადებიდან 800 წლისთავს ავღნიშნავთო.
მალხაზ კოხრეიძე
ჯვრის მონასტერი.ფოტოსურათი ამოღებულია ირაკლი აბაშიძის წიგნიდან "ფიქრები პალესტინაზე"