ახალი კვლევებში საქართველო ანტიკური ენების სამშობლოდ სახელდება
ახალი კვლევების თანახმად, დაახლოებით 15 000 წლის წინ ევროპელ და აზიელ ხალხთა წინაპრები შესაძლოა ერთ ენაზე საუბრობდნენ. ამის შესახებ სამეცნიერო ამბების პორტალი LiveScience წერს.
სტატიის თანახმად, მკვლევარებმა ისეთი სიტყვების რეკონსტრუქცია მოახერხეს, როგორიცაა "mother," (დედა) "to poll" (გაწევა) და "man," (კაცი).
"ამ სიტყვებს კი შესაძლოა, კავკასიის რეგიონში, დღევანდელი საქართველოს ტერიტორიაზე, მცხოვრები ანტიკური მონადირე-შემგროვებლები ხმარობდნენ", - ნათქვამია სტატიაში.
აქვე ნათქვამია, რომ სიტყვათა ჩამონათვალი, რომელიც ჟურნალ "მეცნიერებათა ეროვნული აკადემიის ნაშრომებში" გამოქვეყნდა, შესაძლოა მკვლევარებს ანტიკური მიგრაციისა და პრეისტორიულ კულტურათა ურთიერთობების ისტორიის აღდგენაში დაეხმაროს.
უნივერსალური ენის არსებობის იდეა ბიბლიიდან მომდინარეობს, სადაც აღწერილია, რომ კაცობრიობა თავდაპირველად საერთო ენაზე საუბრობდა.
გაერთიანებული სამეფოს რიდინგის უნივერსიტეტის ევოლუციური ბიოლოგიის პროფესორმა, ახალი კვლევის თანაავტორმა მარკ პაგელმა განაცხადა, რომ მკვლევართა ჯგუფმა ენის 15 000 წლის წინანდელ ფესვებს მიაკვლია. იგი ასევე დაინტერესდა ენის ევოლუციის პროცესი ბიოლოგიური ევოლუციის მსგავსად თუ მიმდინარეობს.
"თუ ეს ასეა, ყველაზე მეტად მნიშვნელოვანი ხშირად გამოყენებადი სიტყვები, რომლებიც ჩვენს სოციალურ ურთიერთობებს აღნიშნავს, ნელი ტემპით უნდა იცვლებოდეს", - აღნიშნა მან.
პაგელმა და მისმა კოლეგებმა ანტიკური სიტყვების რეკონსტრუქცია მოახდინეს. მათ იმ 23 სიტყვის პროგნოზირება მოახერხეს, რომლებიც შესაძლოა 15 000 წლის წინ მცხოვრებ წინაპართა ენებშიც გაისმოდა. ამ სიტყვებს შორისაა "I" (მე), "ye " (შენ), "mother" (დედა), "male" (მამაკაცი), "fire" (ცეცხლი), "hand" (ხელი) და "to hear" (გაგონება).
"სხვა სიტყვებით რომ ვთქვათ, თუ თანამედროვე ადამიანი ქვის ხანის წინაპარს რამენაირად შეხვდებოდა, მათ შეეძლოთ რამდენიმე მარტივი სიტყვა წარმოეთქვათ და ერთმანეთისთვის გაეგოთ", - აღნიშნა პაგელმა.
მისივე თქმით, ამაზე შორს წასვლა ძნელია, მითუმეტეს, რომ ძნელად ცვალებადი სიტყვები "აორთქლებას იწყებენ".
მომზადებულია LiveScience-ის მიხედვით