ხათუნა გოგალაძის განმარტებით, თევზაობისას ძუა, რომელზეც ე.წ. "ეკრანია" დამაგრებული, წყდება, რაც ფსკერზე მოხვედრის შემდეგ თევზებისთვის საფრთხეს წარმოადგენს და ეკოლოგიური მდგომარეობის გაუარესებას იწვევს.
"ცვლილება განპირობებულ იქნა იმ გარემოებით, რომ ეკრანი არის სახლართი ტიპის ბადე, მისი მეშვეობით ჭერა კი ემყარება გახლართვისა და შებოჭვის პრინციპებს. მისივე თქმით, თევზაობისას ხშირი იყო შემთხვევები, როდესაც ძუა, რომელზეც ეკრანია დამაგრებული წყდება და მასზე დამაგრებული სიმძიმის გამო წყალში იძირება. წყალში ჩაძირვისას ეკრან-ბადეთა ერთობლიობა ქმნიდა სახლართი ბადეებისაგან შემდგარ გროვას წყლის ფსკერზე, რომელიც თევზებისა და წყლის სხვა ცოცხალი ორგანიზმებისათვის საფრთხეს წარმოადგენდა. ის ასევე აუარესებდა წყლის ეკოლოგიურ მდგომარეობას, მასში გახლართული და შებოჭილი მკვდარი თევზების ლპობითი პროცესების მიმდინარეობის გამო. ეკრანები დამზადებულია წყალში უხრწნადი მასალისაგან და წლების განმავლობაში ფსკერზე "ეკრანის" არსებობა ქმნის წყლის ცოცხალი ორგანიზმებისათვის ნორმალური ფიზიოლოგიური და ბიოლოგიური რიტმის დარღვევის საფრთხეს",- აღნიშნა მინისტრმა.
ცვლილება საქართველოს მთავრობის 2013 წლის 31 დეკემბრის N-423 დადგენილებით დამტკიცებულ "თევზჭერისა და თევზის მარაგის დაცვის ტექნიკურ რეგლამენტში" შევიდა.
ახალი დადგენილების მიხედვით, სასროლი ბადის პარამეტრები, კერძოდ მისი დიამეტრი, 1,20 მეტრის ნაცვლად 4,5 მეტრამდე გაიზარდა.